Sa sola manera po lompiri in Cogne est cussa de bessiri in pissu de un’elicoteru o sinuncas a pei intru de is caminus de montis. Sa bidda de sa Baddi de Aosta est in genugus a pustis su tempus malu chi nde dd’at boddia: in prus de trexentus funt stetius bogaus de domu e portaus in atras partis cun elicoterus e aparechius. Ma ndi mancat ateretantis.
A is peis de su Gran Paradiso, nemus iat previdiu ca eris a mericeddu totu cuss’abba si podiat scarrigai in aici tempus pagu. Funt centutrinta is millimetrus de abba sinnaus de su pluviometru intru de sa tempesta. Su erriu Grand Eyvia, chi imbucat dapoi in sa Dora Baltea, s’est prenu aici meda de ndi bessiri finas a su caminu regionali 47, chi est su caminu chi aunit Cogne a s’orrestu de su mundu. Po dda torrai a ponni in benis ant a serbiri cidas medas de trabbagliu, sonumancu aici at nau su presidenti de sa Regioni Rentzu Testolin. S’abba meda at postu in disacatu finas s’acuedotu e aici parti manna de sa bidda famada est ancora chena de abba.
Finas Cervinia est stetia boddia de s’abba chi nd’est calada a istrossas, ma no est isolada e su disacatu mannu est massiamenti po is mangasinus de is butegas, prenus de ludu.
In sa Valnontey, isolada de su centru de Cogne po ludu e abba, una de is situatzionis prus diligas. “Eris a merì a pustis chi s’abba e su ludu funt sempiri de prus est stetiu libertau su campegiu Gran Paradiso. In s’albergu nostu eus pigau is sfollaus, cussus chi eus possiu, prus o mancu trinta personis”, contat Christine Cavagnet chi cus sa familia sua est sa meri de s’Hotel Herbetet. Custu mengianu est torrada sa lugi e, finas chi feti in parti, finas is lineas telefonicas.
“S’acuedotu nde dd’at liau s’erriu, seus pensendu a dd’aconciai po s’ora intru de custu merì e cras, po ce dda fairi a preniri sa vasca in manera chi s’abba possat lompiri in Cogne”, narat su sindigu Francu Allera.
Est giai partiu su contu de is dannus e sa Regioni bolit pediri sa calamidadi.
Màuru Mura
Lunis, su primu de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilfattoquotidiano.it/2024/06/30/alluvione-in-valle-daosta-a-cogne-le-auto-trascinate-via-dal-torrente-esondato-video/7606610/
