Su presidenti de sa Regioni Liguria Giuanni Toti est stetiu acapiau a pustis de un’indagu de sa Dda de Genova e de sa Guardia de Finanza. Sa curpa est cussa de sa corrutzioni. Cun Toti, chi a dogna manera est a is acapius in domu, funt stetius acapiaus atrus noi personis, intru de custus Ardu Spinelli, famau po airi ghiau sa scuadra de su Genoa in is annus noranta e su Livorno a pustis, e Paulu Emiliu Signorini, chi fut su presidenti de s’Autoridadi de Filera Portuali de su Mari Liguri Ocidentali, e oi aministradori de Iren. Cust’urtimu est in presoni.
Sa chistioni, cumandada de is publicus ministerus Fideli Manotti e Luca Monteverde, incurpat a su governadori de sa Liguria de airi pigau de Aldu Spinelli e de su figliu Robertu, impromintzias de finantziamentus e de airi erriciu in totu 74.100 euro po “agatai unu caminu” po mudai sa spiagia de Punta Dell’Olmo de libera a privada. Ma non feti: atra curpa est cussa de airi cicau de agiudai una pratiga edilitzia in relata a unu truma immobiliari de Punta dell’Olmo de interessu de is Spinelli chi fut frima in is uficius regionalis. E no acabbat aici: atra curpa, po Manotti e Monteverde, est cussa de fairi allestru e donai po trint’annus sa cuncessioni de su Terminal Rinfuse a sa Terminal Rinfuse Genova S.r.l (cumandada po su 55% de is matessi Spinelli). Dapoi, atra curpa est cussa de donai a Spinelli is spatzius de su portu chi funt a innantis de sa Carbonite Itar e Carbonite Levante.
A is acapius in domu est acabbau finas Mateu Cozzani, omini potenti acostau de Toti, cun sa curpa de corrutzioni eletorali po airi agiudau, sempiri po is Publicus Ministerus, sa mafia. Suta indagu finas Franciscu Moncada, consiglieri de amministatzioni de Esselunga Spa, chi po calencunu tempu no at a podiri trabagliai.
Is magistraus genovesus ant finas secuestrau benis po 570 mila eurus.
Màuru Mura
Mercuris, s’otu de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.wikipedia.org/wiki/Giovanni_Toti
