Po tenni fidi e spera manna tocat a castiai sa tassa mesu prena: a su Casteddu est andada beni meda ca su Lecce, eris in sa partida de ora de prangiu in s’Unipol Domus, non dd’at furau nudda. Antzis, cun is dus palus chi nd’at boddiu a s’acabbu de sa partida, candu funt giai in paridadi, at erriscau de dda binciri custa partida.
Est a nai, a dogna manera, ca a giogai in dexi contras de undixi po parti manna de sa partida no est cosa facili de fairi. Difatis sa partida est mudada a pustis chi s’arbitru c’at stupau a Gaetano. Non podiat fairi diversamenti, poita s’intrada de su giogadori napoletanu fut legia de averas. Passientzia manna, ma fut giustu!
Finas a tandu is piciocus de Ranieri furint gioghendu beni meda e iat giai fatu gol cun Mina. A pustis su cartellinu orrubiu po Gaetano sa partida est stetia un’atra. Su Lecce at pigau fidi manna e candu mancaiant nemancu dexi minutus a s’acabbu ce dd’ant fata a da torrai a ponni in ecuilibriu.
Ranieri at chistionau cun is giornalistas, comenti in donnia: “Deu pensu ca s’arbitru c’iat bistu beni cun su cartellinu grogu, ma una bia chi su Var ti lamat cuasi amaroglia depis mudai. Lastima manna, poita finas a tandu fustis fendu beni meda e ce dda iaus fata a non fairi giogai su Lecce comenti scit fairi: est de tandu chi sa partida est cambiada”.
Ma castiendu massimamenti is dus palus lecesus e is duas ocasionis in sa matessi atzioni, su “Casteddu at erriscau de dda perdiri”, aciungit s’allenadori. Chi sighit: “Eus poderau finas a candu ddu eus possiu fairi. Issus ci funt arrennescius a fairi gol e in segus podiant finas binciri. Ma candu non si podit binciri est meglius a si pigai finas unu puntu”. Immoi conca a sa partida de dominigu chi benit cun su Milan. At essi dificili, ma finas cun s’Inter fut aici. E scieus totus comenti est andada a acabbai!
Màuru Mura
Lunis, su ses de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=1Lmsto_W7Cc
