In sa diga de Maccheronis s’agatat abba feti finas a su dexi de austu. Est cussu chi nd’est bessiu a pigliu de s’atobiu de eris a mengianu in Nugoro intru de su prefetu Giuanni Carrulu Dionisi cun is corantatres sindigus de sa zona. Cun issus, in is aposentus de sa Cuestura finas su presidenti de su Consortziu de Bonifica de sa Sardigna de mesu Ambrogio Guiso e is ominis de sa Coldiretti.
Sa chistioni est de prangiri de averas: sa diga, aunia si frimat s’Erriu Posada, cun prus o mancu otu milionis de metrus de abba, chi non proit meda, at a podiri donai abba finas feti a is primas dis de austu. Su disisperu est sa chistioni at a ponniri in genugus sa zona de mesu e cussa de orienti de s’Isula: de sa Baronia a sa Gaddura bascia. Is sindigus pedint a bogi arta atzionis inderetura, massimamenti infrastruturas po acabbai, po sempiri, is problemas. “Est una chistioni grai finas po is digas de s’Ogliastra, de sa Nurra e de su Sulcis, ma po Maccheronis est ancora peus – at acrariu su presidenti de su Consortziu –. Dde is binticuatru milionis de metrus de abba de ocannu passau seus calaus a otu metrus immoi, ma ndi podeus umperai feti cincu milionis. Chi abarrat aici podeus lompiri feti a su dexi de austu benienti”.
In is biddas de sa Baronia e de sa Gaddura bascia est giai de un’arratu de tempus chi s’est cumandau de non podiri infundiri is campus e nemancu preniri is piscinas, in su mentris chi in su sartu s’abba si podit umperai feti po donai a bufai is pegus.
In su fratempus is sindigus cicant solutzionis. “Intru de calencuna cida, chi non proit, seus aici postus mali chi at a tocai a serrai is domus de dus chi s’agatant in sa costa”, at nau su sindigu de Siniscola Giuanniluisu Farris. In Santu Tiodoru, invecias, sa sindaga Rita Deretta, at atobiau eris a mengianu etotu, su Coc po ddi donai in manu su problema.
Màuru Mura
Mercuris, su catodixi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.avvenire.it/attualita/pagine/siccita-fiumi-e-laghi-poveri-d-acqua-come-mai
