“In is presonis italianus m’ant fatu intendiri unu Rei”. A ddu nai est Chico Forti, s’italianu lompiru de is Stadus Unidus, aunia s’agataiat in cella de binticuatr’annus, e chi immoi est in su presoni de Verona.

In Rebibbia, aunia est abarrau po tempus pagu, a pustis sa torrada in Italia, at nau a sa trasmissioni “Cinque Minuti”, “m’ant nau: ‘Su cumandanti ddi bolit fueddai’. Pensaia chi fessit calencunu secundinu, ma invecias fut Schettino, su cumandanti de sa Custa Concordia afundada una pariga de annus a immoi. M’at nau: ‘Chico ses s’eroi miu’”.

Intru de su presoni de Miami e cussu de Verona c’at una diferentzia manna. Cussu de Miami est unu presoni po puniri e est unu logu aunia ses umiliau de sighiu, invecias innoi apu connotu umanidadi chi non apu connotu in is urtimus binticuatr’annus de impresonamentu”, at aciuntu Forti, su cali chistionendu de sa sa mama, femida de norantases annus, at nau: “Est s’orroca mia, est stetia sa fortza mia. In is ogus sus si ddue agatat de totu. In su 2008, chi est sa bia urtima chi dda ia bida m’iat nau ca iat airi fatu de totu po m’aspetai. Est stetia de fueddu”.

Chico Forti, cundennau in Florida a su presoni a vida po airi bociu un’omini, at sempiri nau de essiri innocenti e at aciuntu: “Chi tui ses seguru de no airi bociu tenis sa fortza de andai a innantis dì po dì. No apu mai pensau a is binticuatr’annus fatus, ma sempiri a sa dì in fatu. Chi non creis in calencuna cosa o ti bocis o mudas sa vida”. E in pissu de su benidori at nau: “Soi stetiu postu a un’ala po totu custu tempus, ma sa gana de biviri no est mudada po nudda”.

E infinis chistionendu de sa dì chi at scipiu de torrai in Italia: “Su primu de martzu apu

erriciu una lamada chi at postu in arriolu totu su presoni, poita m’ant nau chi fut de sa Casa Bianca. Su primu chi m’at fueddau fut s’ambasciadora italian in Washington, sa cali m’at nau de s’agatai cun Biden. In segus apu chistionau cun Giorgia Meloni”.

 

 

 

 

 

Màuru Mura

 

 

Giobia, su trinta de maju de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.adnkronos.com/cronaca/chico-forti-miami-italia-carceri-re_5VKgMM8ArD1zzodWs3iYg4