Sa parti caglienti de sa classifica de sa Serie A, cussa aunia si gherrat po non ci calai in sa Serie B est, a tres partidas de s’acabbu de su campionau, erriscosa po scuadras medas. Ancora no est sarvu mancu su Lecce, chi est a trintaseti puntus, ma est a nai ca ddi mancat pagu de averas. A sighiri agataus su Verona cun trintacuatru puntus e dapoi su Casteddu cun trintatres, su Frosinone e s’Empoli cun trintadus, s’Udinese cun trinta e su Sassuolo cun bintinoi. Giai calada sa Salerntana chi serrat sa classifica cun cuindixi puntus. A castiai is partidas chi mancant iat a parri ca cussa posta peus est s’Empoli, chi s’agatat tres partidas dificilis meda. Ma a custu puntu de su campionau non tocat a castiai meda cun chini si giogat, comenti at amostau s’urtima giornada aunia su Sassuolo at bintu cun s’Inter e su Verona cun sa Fiorentina.

Donendu una mirada a sa classifica, duncas, ddu est s’erriscu mannu chi si possat lompiri a is matessis puntus po prus de una scuadra.

Eita iat a sussediri? Chi duas scuadras lompint a su postu de dixiotu non si fait prus una partida sica comenti fut finas a ocannu passau, ma duas. Sa torrada in domu at essi decidia po comenti funt stetias is partidas intru de su campionau. Atra nova est ca chi s’acabbat in paridadi si passat inderetura a is tirus de is undixi metrus, sartenduru is suplementaris. Ocannu passau, arregodaus, fut serbia una partida intru de su Verona cun su Spetzia po connosciri sa scuadra de tres a ci calai. Iat bintu su Verona, in partida sica, po 3-1.

Chi, invecias, a lompiri totu paris funt tres scuadras ant essi feti duas a fairi su sparegiu. S’at a pigai in cunsideru sa classifica cumpartzia intru de is tres scuadras. Sa meglius posta si sarvat e is atras duas si giogant s’urtimu postu.

Atra possibilidadi est cussa de agatai tres scuadras a su postu de dixiannoi. Tandu ci calat cussa posta peus in sa classifica cumpartzia e is atras duas si giogant s’atru postu.

Sa spera est chi a su Casteddu non pertochit peruna de custas chistionies.

 

 

 

 

Màuru Mura

 

 

 

Mercuris, s’otu de maju de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.calcionapoli24.it/serie_a/classifica-serie-a-2023-2024-n384313.html