Su Casteddu, cun su prenu de totu is giogadoris, bisat de binciri contras de s’Atalanta in sa partida chi s’at a giogai cras in sa Domus Arena a is tres de a pustis prangiu.
Davidi Nicola at cuberau a Lapadula e at a tenni totu is giogadoris a disponimentu. Is numurus chi est amostendu s’Atalanta, chi arregodaus cumandat sa classifica de sa Serie A, funt spantosus, ca est de noi partidas una in fatu de s’atra chi est bincendu. E, massimamenti po custu, s’allenadori casteddaiu iat a podiri fairi a giogai, de su cumentzu, is matessis giogadoris chi at amostau in Firentze dominigu passau. Duncas at essi facili a biri Zappa e Zortea in sa parti dereta e Obert cun Augello in cussa de manca e Piccoli s’unicu giogadori in a innanti. Luvumbo at abarrai setziu a su cumentzu, ma prontu po imbucai a ponni in dificoltadi sa difesa de Gasperini in sa parti de duas. In mesu a su campu at a giogai Adopo a su costau de Makoumbou ca aici sa parti de centrucampu at essi ancora prus de sustanzia. In palas fidi a Luperto cun Mina e duncas Palomino s’ata torrai a setziri. Marin tenit prus possibilidadis meda de Viola e Gaetano po giogai in palas de Piccoli. Custu sempiri po tenni una scuadra prus imboddiada, ma pronta a si dda giogai.
S’Atalanta, invecias, at a tenni a disponimentu finas Cuadrado, chi at sartau is partidas contras de su Milan e su Real Madrid. Ma no at a giogai de su cumentzu ca in cussa parti de campu at essi Zappacosta su giogadori sceberau de Gasperini. Ancora foras Scalvini e cuncas ant essi Kolasinac, Kossounou e unu intru de Hien e Djimsiti a giogai indenanti de Carnesecchi. Ruggeri in sa parti bascia de manca e a mesu campu Ederson cun De Roon. Pasalic in palas de is atacantis chi ant essi Retegui e unu intru de Lookman e De Ketelaere. S’arbitru at essi Luca Pairetto.
Màuru Mura
Cenarba, su trexi de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.dazn.com/en-IT/home
