De sa Germania, aunia si funt gioghendu is Europeus de fubalu lompint is primas beridadis. Eris a merì s’est serrau su Gironi A cumpartziu de is natzionalis de sa matessi Germania, sa Svitzera, sa Scotzia e s’Ungheria. Si giogaiant is partidas intru de is meris de domu contras de is elveticus e de is ungheresus contras de is scotzesus. Sa de unu est acabbada in paridadi, ma est a nai ca sa Germania at agatau su gol de s’1-1 a sa fini de sa partida, invecias sa de duas at bidu s’Ungheria a binciri po 1-0. A pustis de custas duas partidas po immoi is scuadras cualificadas a is otavus funt sa Germania e sa Svitzera, cun s’Ungheria chi depit aspetai s’acabbu de is atrus gironis.
Oi at essi sa bia de su Gironi B, cussu aunia ddu est s’Italia. Sa Spagna, innoi, est giai segura de su primu postu e a s’Italia iat a bastai unu puntu custu merì contras de sa Croatzia po andai ainnantis. Ma finas perdendu is asulus no iant torrai a domu, ca comenti s’Ungheria iat a tenni sa spera de passai che una de is cuatru meglius tertzas. Sempiri donendu po scontau chi s’Albania non bincat cun sa Spagna.
A dogna manera eris at chistionau s’allenadori de s’Italia Lucianu Spalletti: “Ci cunt partidas – at nau – chi sa storia tua dda faint diventai o manna o pitica. Seus cunvintus de tenni in scuadra piciocus bravus e fortis chi si dd’ant a giogai. Craru est ca sa partida cun sa Spagna non m’est pragia po nudda”.
“Soi allirgu meda de cussu chi s’est amostau in custas dis, a pustis sa partida perdia cun sa Spagna. Seus una grandu truma de is calis e tengiu fidi manna” at aciuntu Spalletti chi at finas chistionau de is piciocus chi ant a cumentzai sa partida cun sa Coatzia: “Est craru chi a pustis sa partida cun sa Spagna sa pensada de mudai calencuna costa s’agatit in conca”. Totu lassat pensai ca at a giogai Retegui de su cumentzu e Scamacca s’at a sentziri in panchina.
Màuru Mura
Lunis, su binticuatru de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://formiche.net/2017/01/immigrazione-e-sicurezza-la-strada-comune-di-italia-e-croazia/
