Su Casteddu at trabbagliau cuasi totu sa cida in Asseminello, cun s’intremesu de sa partida binta cun sa Cremonese in Coppa Italia e immoi cicat finas sa vitoria de unu in su campionau de Serie A, custu merì a is noi oras mancu unu cuartu, in Parma. “Sa pensada de trabbagliai totu paris po una cida nos’at giuau, poita teneus abbisongiu de no si connosciri meglius”, at nau s’allenadori de su Casteddu Nicola s’atra dì in s’atobiu cun is giornalistas. “Sa partida de Coppa Italia at donau un’indicu e immoi depeus sighiri in cussu caminu: sa chistioni est ca seus una scuadra chi si depit sarvai!”. In sa partida cun sa Cremonese su Casteddu est partiu cun cuatru giogadoris in palas, a s’imbessi de is atras partidas aunia giogaiat cun tres difensoris. “Podeus giogai in duas maneras ca is carateristicas de is giogadoris funt craras: creu chi is giogadoris, po cussu chi ant amostau in sa parti de unu de sa preparatzioni ddu apant cumprendiu”, sighit a nai Nicola.
Su Parma at giai amostau de essiri una scuadra chi giogat beni, ma Nicola non s’arriolat: “Su Parma est una scuadra forti comenti totus cussas chi s’agatant in Serie A. Est pesada beni meda de tres annus a cust’ala. Nosu eus trabbagliau, massimamenti in custa cida, po arriolai a totus. Boleus fairi in manera ca rinas po is atrus non siat facili a giogai contras de nosu”.
Mateu Prati est cuberau ca s’est allenau po parti de sa cida e at essi un’atra borta intru de is “arruolabilis”, ca mancaiat de su 31 de austu in Lecce. Non ant essi de sa partida de seguru Wieteska, Pavoletti e Jankto, in prus de Lapadula chi est bessiu de sa partida cun sa Cremonese unu pagu postu mali.
Su Casteddu est sa scuadra chi at tirau de prus in porta, ma at fatu feti unu gol: “Chi intzertas sa porta de inigui podint nasciri atras situatzionis. Tocat a migliorai”, serrat Nicola.
Màuru Mura
Lunis, su trinta de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.dazn.com/it-IT/home/a1pp0j40dkl32ltn9zjrkgsus/9ol45fx12qpuducflxqbpaa5p
