“Sa presidenti Todde pensit a is cosas de importu de sa Sardigna e spundat cun galania a sa disponibilidadi amostada de is ministrus de su Guvernu Meloni invecias de ponni menti a is cumandus de Giusepu Conte nendu cosas malas po su “ddl” in pissu de s’autonomia deferentziada”.
Aici Sarbadori Deidda, deputau de is Fradis de s’Italia, arrespundit a Alissandra Todde chi, intru de is trabbaglius de sa Giunta Regionali, si dd’at pigada contras de s’Autonomia diferentziada.
“In pissu de sa sanidadi e de is trasportus – arregodat Deidda – chini at decidiu intru de Stadu e Regioni chi ancora oi nosi obligant? Arrespundu deu: is amigus de sa presidenti Todde. Chini at postu in campu su mudamentu costitutzionali de su ‘Titolo V’? Sempiri is amigus chi guvernant cun sa presidenti Todde. Sa Sardigna no at nudda de timiri de s’Auronomia diferentziada. Antzis, est a nai ca podit pretendiri leis e finantziamentus giai de su Guvernu Natzionali e giai de sa Comunidadi Europea, ma sa presidenti Todde e sa magiorantzia chi nosi guvernat tenit pensadas e progetus po ndi pesai sa Sardigna?”.
Finas su deputau de sa Lega Dariu Giagoni difendit sa riforma chi est stetia bofia in manera crara de sa Lega etotu: “S’Autonomia diferentziada no est una bregungia, non c’at essi peruna diferentzia intru de una regioni de s’atra. Todde – est sa cunvintzioni de Giagoni – no at studiau e si dda pigat cun su Guvernu poita non tenit unu progetu po fairi torrai a partiri sa Sardigna. No at ligiu in manera crara e donendu atentzioni, tantis po nai, sa lei in pissu de is catodixi materias comenti is politicas sanitarias aungia abbisongiat definiri is Lep chi ant a garantiri is prestatzionis minimas in totu is regionis, e finas in Sardigna”.
Dognunu tirat abba a domu sua, comenti de sempiri. Ma no iat essi meglius a pensai feti a sa Sardigna?
Màuru Mura
Cenarba, su bintunu de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.infodent.it/news/autonomia-differenziata-libera-al-ddl-dalla-camera
