Is numurus de su mancamentu de abba in Sardigna funt sicus, aici comenti su sartu e calencunu erriu. In is digas si ddue agatant 805,37 milionis de metrus cubus de abba: funt frenus po nemancu sa metadi ca funt a su 44,15%. Feti su mesi passau is numursu funt prus mannus ca lompiant a 915,8 milionis, est a nai ca si funt perdius 110,43 milionis de metrus cubus de abba in trinta dis e funt prenus po prus pagu de sa metadi, ca trinta dis a oi lompiant a su 50,21%.
Poita totu custu? Facili de intzertai: in su mesi de austu passau in Sardigna est erribada genti meda e duncas s’est spaciada prus abba. Ma fatus dus contus si scoviat ca dogna dì in Sardigna funt stetius spaciaus tres milionis e mesu de metrus cubus. Chi iat depiri sighiri aici s’abba bastat feti po atrus duxentus trinta dis, ca non si podit pigai de su fundu. Ant a serbiri, chi non proit in s’atongiu e in s’ierru benienti, a serrai s’abba in calencuna ora de sa dì o de su noti.
Funt numurus legius de averas cussus chi lompint de s’Autoridadi de is bacinus, publicaus s’atra dì e chi erribant finas a su 31 de austu. Po cumprendiri beni ca funt legius iat a bastai a castiai is numurus de is atrus annus passaus. Po nai, is numurus de ocannu passau in su matessi mesi de austu funt custus: s’agataiat abba po 1.134,16 milionis de metrus cubus in is digas e custas funt prenas po su 62,18%. Duncas de ocannu passau a ocannu mancant 328 milionis de metrus cubus. E finas in s’annu 2022 e in su 2021 is numurus funt, prus o mancu, su matessi. Dexi annus a immoi, in su 2014 si giumpaiant is 1.200 metrus cubus. E, chi castiaus ancora prus a tesu, est a nai a su 2009, duncas cuindixi annus a immoi, si cumprendit ancora de prus cussu chi est sussedendu: funt, in su 2009, 1385 metrus cubus de abba chi teniaus, est a nai 580 milionis de metrus in prus de cussu chi teneus oi.
Màuru Mura
Martis su tres de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://barilive.it/2024/05/13/pozzi-a-secco-e-invasi-vuoti-lagricoltura-pugliese-in-ginocchio/
