Eris si funt serraus atrus dus gironis de sa filera de unu de is Europeus de fubalu chi si funt gioghendu in Germania: su gironi C e cussu de D. Andant a innantis in su primu s’Inghilterra e sa Danimarca, comenti de prima e segunda e in su de dus, sempiri comenti de prima e segunda s’Austria e sa Francia. Ma, est seguru, benint torradas a piscai comenti de tertzas classificadas finas Slovenia e Olanda, ca ant giai fatu meglius de atras duas scuadras, s’Ungheria e sa Croatzia, chi funt su matessi lompias tertzas, ma fendu peus. Est a nai ca in su gironi cosa sua s’Inghilterra est cussa chi at deludiu de prus, ca andat a is otavus feti cun dd’unu gol fatu (cussu de Bellingham in sa prima partida contras de sa Serbia). Difatis is inglesus, po immoi, ant bintu giai una partida, ma in is atrs duas, cun scuadras mancu aici fortis comenti sa Danimarca e sa Slovenia, non ce dd’ant fata a binciri, paregiundu is matessis partidas po 0-0.

Non meglius, in s’atru gironi chi est acabbau eris, at fatu sa Francia, chi serrat, su propriu, cun cincu puntus in classifica a is palas de s’Austria e indenanti de s’Olanda. Sa Francia, comenti de s’Inghilterra, at bintu una partida (sa de unu chi at giogau cun s’Austria po 1-0 e gratzias a unu “autogol”) e paregiau is atras duas cun s’Olanda, po 0-0 e sa Polonia 1-1. Spantosu, e prenu de bellu giogu e gol medas, su caminu de s’Austria chi a pustis airi perdiu cun sa Francia at bintu cun sa Polonia po 3-1 e cun s’Olanda po 3-2.

Est a nai ca Inghilterra e Francia, a innantis de cumentzai, funt duas de is scuadras favoressias po binciri, ma po immoi no ant amostau nudda de bonu. Totu un’atru contu invecias natzionalis comenti de Spagna e Portogallo, chi po s’ora po cussu fatu biri in campu funt stetias is meglius, chena peruna duda. Ma sa bocia est tunda e podit torrai a si ponni in caminu bia Berlino finas s’Italia de Spalletti.

 

 

 

Màuru Mura

 

 

 

Mercuris, su bintises de làmpadas de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://stock.adobe.com/it/images/bandiera-di-francia-e-inghilterra/23265854