Sa nova, cun calencuna dì de istentu, est ca su gol de Zaccagni, candu sa partida fut acabbendu, contras de sa Croatzia nd’at betau de s’aparechiu sa natzionali italiana. Bastat a castiai su totu ca cun sa vitoria de sa Georgia cun su Portogallu, s’Italia iat airi setziu in aereu e torrada a domu. Difatis sa matessi Italia non iat essi stetia una de is tertzas meglius. Ma tanti immoi est fata.
S’atra nova est ca is scuadras, in su paperi, prus fortis funt de s’atra parti de su tabelloni de is otavus de finali de s’Europeu de fubalu chi s’est gioghendu in Germania de cuindixi dis a custa parti. Difatis in sa parti a faci de cussa de s’Italia si ddue agatant sa Spagna, sa Francia, sa Germania, su Portogallu e su Belgiu. De sa parti de is asulus invecias is scuadras prus perigulosas, torraus a nia feti in su paperi, funt s’Inghilterra e s’Olanda, chi in is gironis, a dogna manera, no ant amostau unu giogu spantosu. Est a nai finas ca po cussu chi ant amostau is piciocus de Spalletti bastat sa Svitzera, chi at giogau beni meda, po ddus ponni a un’ala. Ma forsis po comenti est lompia sa cualificatzioni calencuna cosa s’at essi movia in is giogadoris italianus. E, dapoi, est a nai puru ca in partidas de aintru o a foras mudat totu e bastat sa stedda bona.
A sighiri, is partidas chi ant a decidiri sa cualificatzioni a is cuartus. Is asulus chi bincint cus is biginus de domu de sa Svitzera ant a giogai cun cussa chi ndi bessit de sa partida Inghilterra-Slovachia e at essi, po is inglesus, un’arrevesa de sa finali de tres annus a immoi. Sempiri a is cuartus funt possibilis is ingrugius intru de sa Spagna cun sa Germania e sa Francia cun s’Inghilterra.
Otavus de finalis
Sabudu 29 de lampadas Italia-Svitzera
Sabudu 29 de lampadas Germania-Danimarca
Dominigu 30 de lampadas Spagna-Georgia
Dominigu 30 de lampadas Inghilterra-Slovachia
Lunis primu de triulas Portogallu-Slovenia
Lunis primu de triulas Francia-Belgiu
Martis 2 de trulas Romania-Olanda
Martis 2 de triulas Austria-Turchia
Màuru Mura
Cenarba, su bintotu de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.sportmediaset.mediaset.it/speciale/europei-germania-2024/euro-2024-il-quadro-degli-ottavi-di-finale-italia-nella-parte-del-tabellone-con-inghilterra-e-olanda_84010556-202402k.shtml
