Su nuscu de binciri ddu intendiat giai de su pusti prangiu. Massimu Zedda est lompiu in via Emilia biora de is cuatru. Bestiu comenti de sempiri: jeans e camisedda arva. Sa giachigedda in pissu de is palas poita su calori fut meda. S’est serrau in s’aposentu de su pianu de dus paris a is prus strintus agiudadoris. Giai de sa conta de is primus dexi setzionis si biat ca is cosas funt andendu beni meda: Massimu Zedda prus o mancu a su 60% e Alissandra Zedda a su 35%. Is atrus stesiasus de meda. Custus numurus funt abarrasus finas a s’acabbu de sa conta. Biora de is seti de merì Massimu Zedda s’est amostau po chistonai cun is giornalistas. Po sa borta de tres at essi sindigu de sa citadi de Casteddu. “Depu torrai gratzias a innantis de totu a is dexi listas chi si funt postas a su costau miu e a totu sa genti chi nos at sceberau. Immoi intendu in pissu unu bellu carrigu de responsabilidadi, sa prima cosa de fairi est cussa de arrespundiri a is citadinus, massimamenti a cussus chi s’agatant in dificultadi manna. Depeus donai una spera de trabbagliu a is giovuu casteddaius, cichendu de non ddus fairi partiri”. A pustis airi chistonau cun is giornalistas, biora de is otu de merì s’est amostau in prassa Garibaldi a festai cun sa genti sua. A su costau, allirga meda, sa presidenti de sa Regioni Alissandra Todde: “Su Campu Largu in Casteddu e in Sardigna depit essiri s’esempiu po totu s’Italia. Si depit castiai de nosu po cumprendiri e non faddiri”.
S’imbrassu de sa citadi cun Zedda est spantosu. In prassa Garibaldi s’amostant becius, feminas, ominis chi s’acostiant po ddi stringiri sa manu e ddi torrai gratzias. Non mancant is giovunus, medas de averas. Fueddat Massimo: “In custas dis tocat a arregodai candu est stetiu bociu Jagu Matteotti e sa morti de Erricu Berlinguer. A issus bogliu intregai custa spera noa chi sa genti tenit po nosu”.
Màuru Mura
Martis, s’undixi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://ilmanifesto.it/cagliari-massimo-zedda-riconquista-il-comune
