A dolumannu, sa partida de eris a is ses de merì, no at essi arregodada in su tempus benienti po sa bona stedda. Difatis su Casteddu nd’at boddiu, po duas bortas, sa traversa. Cussa de eris est, a pustis duas giogadas in domu, sa prima partida perdia. Difatis su Lecce de Gotti, finas chi po totu sa parti de duas est abaarrau in dexi giogadoris in campu, ca s’arbitru c’at stupau a Dorgu, bincit po 1-0, gratzias a su gol de Krstovic dapoi de bintises minutus chi sa partida fut cumentzada.
Sa prima partida perdia donat, a dogna manera indicus a s’allenadori Nicola po cicai de ddue trabbagliai immoi chi su campionau si frimat po una cida. “Sa Serie A est finas custa: tocat a poderai is pensadas de comenti giogai, ma depeus gairi de prus meda po cicai de fairi is gol candu teneus ocasionis medas comenti de oi. De seguru tocat donai atentzioni manna candu si giogat cun sa bocia frima”, custus is primus fueddus de s’allenadori piemontesu. “Is piciocus ant tentu ocasionis medas e ant giogau: a parti is duas traversas, una de is calis candu sapartida fut ancora in paregiu. Ma candu non ce dda faia a fairi gol agatendudì po duas bortas a sa sola indenanti de su portieri bolit nai ca depis trabbagliai ancora. Nosu, finas chi teniaus duas dis de pasu prus pagu de su Lecce, eus amostau ca seus postus beni”, at sighiu a nai Nicola .
Su matessi allenadori non ci calat de seguru su contu de torrai in Sardigna cheba perunu puntu: “Giai a ndi torrai feti cun dd’unu puntu nosi iat airi strobbau, figuraosì a ndi torrai chena de nudda”. Una chistioni chi non ddu allirgat, massimamenti ca po totu sa parti de duas de sa partida su Casteddu s’est agatau a giogai cun s’omin in prus. “Issu funt abarraus in dexi e si funt serraus in s’area insoru e nosu depiaus fairi girai sa bocia prus coidendu e cun prus calidadi. A dolumannu non ce dda eus fata a fairi gol e in su fubalu est custu su chi contat”.
Màuru Mura
Dominigu su primu de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=TXGRuvmgpe0
