A sa presidenti de su Guvernu Giorgia Meloni dd’at nau ca si nd’andat, ma issa at nau ca nou, finas poita, assegurat Gennaro Sangiuliano, “non soi ricatatabili”. Su ministru andat in televisioni, a su primu canali, pedit scusa a is personis chi bolit beni e chi funt in mesu a sa chistioni, e narat un’atra bia ca perunu euru de su Stadu est stetiu umperau po pagai is viagius cun Maria Rosaria Boccia.

“Teniaus una relata, finas po custu nde dd’apu tirau s’incarrigu”, narat po cantu pertocat sa nomina non fata de sa Boccia po essiri consigliera de is Atobius Mannus. Po issa, aciungit, “no apu mai umperau dinari de su Stadu, apu pagau totu de buciaca mia” E duncas “non soi ricatabili comenti si narat”, torrat a nai nendu de airi amostau a su diretori de su telegiornali de su primu canali, Giuanni Marcu Chiocci, is numurus de sa banca e is biglietus de su trenu po Milanu e de s’aparechiu po Taormina, pigaus paris a Maria Rosaria Boccia. “Ddus apu pagaus deu – torrat a nai – cun dinari de su contu chi tengiu in sa banca”. “Mi strobat a chistionai de totu custu, poita est una relata personali”, cunfessat.

“Sa prima personi a sa cali depu pediri scusa, poita est una personi sapntosa, est pobidda mia – narat galu cun is lambrigas in is ogus –. Pedu scusa finas a Giorgia Meloni po is problemas pesaus a issa e a su guvernu. Pedu scusa a is agiudantis mius chi si funt agataus in mesu a sa chistioni”.

Unu crarimentu chi abbisongiaiat e aspetau, finas de Maria Rosaria Boccia chi pagu a innantis de intendiri cussu chi teniat de nai su ministru iat nau ca aspetaiat a sa setzia cun is po corn in manus: “totu lompit po chini scit aspetai”. In dd’unu scritu in Instagram, sa matessi Boccia, scrit de airi intendiu su ministru in is oras in is calis Sangiuliano fut chistionendu cun Giorgia Meloni.

 

 

Màuru Mura

 

 

 

Giobia su cincu de cabidanni de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ilfattoquotidiano.it/2024/09/04/sangiuliano-al-tg1-su-boccia-relazione-affettiva-non-sono-ricattabile-dimissioni-respinte-da-meloni-lei-ribatte-subito-sui-social-bugie/7681066/