Sa dì in segus sa serrada de sa presentatzioni de is listas po is comunalis de Casteddu, tocat a Massimu Zedda, a pustis de Giusepu Farris po CiviCa2024 e Alissandra Zedda po su centrudresta, a si pigai totu sa scena. Su candidau sindicu de Casteddu po su centrumanca, chi giai at bintu daus bortas po sa cadira prus arta de Palatzu Bacaredda, at sceberau Pirri, prus che a totu sa prassa manna de sa Vetreria becia, po cumentzai sa campagna eletorali po sa torrada de s’otu e de su noi de làmapadas chi ant a lompiri.
“Sa municipalidadi de Pirri est sa sola realtadi abarrada comenti de acapiamentu intru de is citadinas e is citadinus e su Cumunu de Casteddu. Andat posta in pumus artus”, at nau Zedda a su cumentzu.
Po cantu pertocat sa cultura Massimu Zedda at impromintiu de torrai a oberri is logus medas chi oi funt serraus, comenti su tiatru de sa Vetreria becia. Zedda at, in segus, chistionau de sa pulitzia de sa citadi, de is caminus, de su traficu e viabilidadi, massimanenti de cicai solutzionis po su “nuu” de sa 554. Ma at fueddau finas de is cantieris de trabagliu chi ant frimau Casteddu e chi andant acabbaus coidendu su prus possibili. Atras chistonis chi Zedda at tocau funt sa cuntierra de sa burocratzia, su mudamentu de passu in is relatas cun is citadinus, sa pensada de torrai a pigai su progetu de is canalis navigabilis. Totu custas pensadas faint parti de su programa de Massimo Zedda e de totu is listas chi s’agatat a su costau.
Fut in jeans e camisedda arba, cun is manigas rumbuladas finas a su cuidu e at chistonau chena perunu paperi po cuasi duas oras indenanti a cincuxentus personis. Intru de una chistionada e un’atra de is candidaus de is dexi listas chi ddu iant a bolli comenti de sindigu po is cinc’annus benidoris, non fait mancai calencunu fueddu contras de su centrudresta e sa candidada Alissandra Zedda: “Cussa truma de genti, finas chi cun nominis diversus, est sa matessi chi in is urtimus cinc’annus at guvernau in Casteddu. Non mi possu scaresciri ca Alissandra Zedda at sceberau de passai de Fortza Italia a sa Lega, unu partidu chi bolit dividiri s’Italia”.
Màuru Mura
Lunis, su trexi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.algheronotizie.com/contenuto/0/12/501278/massimo-zedda-ritorna-una-scommessa-sul-futuro-di-cagliari-tra-rotonde-e-rinnovamento
