Sergiu Mattarella oberit s’annu de sa scola in su Cunvitu Natzionali. Cumentzat cun una pariga de fueddus in sardu e dapoi sa chistionada longa. Intru de custu narat ca “Su dinari chi benit donau a is insegnantis non mi parti a s’artaria giusta”.
Su Presidenti de sa Republica bessit in pissu de su palcu de su Cunvitu Natzionali, intregau a Vitoriu Emanueli II, in Casteddu, pagu prima de is seti de mericeddu: innoi inaugurat s’annu de is scolas e, po una dì, est sa citadi prus manna de sa Sardigna sa Capitali de sa scola.
Is primus fueddus funt “Unu saludu a totu sa genti sarda”, nau propriu in sa limba nosta. In segus chistionat a is autoridadis, a sa genti ospitada, intru de custa is sportivas Marta Maggetti e Alessia Orro cun is cumpangias de sa nazionali de pallavolo chi ant bintu sa medaglia de oru su mesi passau in is Olimipiadis de Parigi. At, a pustis, cumentzau sa fueddada sua, massimamenti ponendu in is pumus artus s’importu mannu de s’istrutzioni, cun calencunu fueddu po s’abbisongiu de guvernai su pesamentu de sa tecnologia e de s’umperu cosa sua prus che a totu, po is piciocus, cun su smartphone.
“Sa scola torrat a cumentzai. E cun issa torrant a cumentzai sa spera e is emotzionis, torrat s’acapiu cun is amigus e si atobiat genti noa. De sempiri sa scola arrepitit su tempus de is familias et est un’ora de importu mannu po sa vida de totu sa comunidadi italiana. Su cumentzu de sa scola lompit a s’acabbu de dogna istadi, ma in beridadi est sempiri unu tempus nou. Is piciocas e is piciocus funt crescius in su corpus e in sa conca. Funt mudaus. Is professoris insoru, becius e nous, ddus ant erricaus in is contus de vida insoru e si funt postus in conca obietivus nous. Finas sa sociedadi est andada a innantis, intru de problemas de annus meda e sfidas noas de su totu”, at nau, intru de atras milli chistionis su Presidenti.
Màuru Mura
Martis, su dixiaseti de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.bancadelterritoriolombardo.it/news/le-parole-del-presidente-mattarella-le-bcc-e-il-contributo-significativo-al-capitale-sociale-dell-italia/
