Cumentzat cun dd’una vitoria su Casteddu nou de Nicola: 3-1 a sa Carrarese e aici andat a innantis in sa Coppa Italia, aunia at atobiai sa Cremonese a s’acabbu de cabidanni. De is giogadoris lompius ocannu at fatu gol Piccoli.
Davidi Nicola, po sa prima partida de ocannu, scioberat spantosamenti unu 3-4-2-1 oguali a cussu de sa Carrarese: Luvumbo e Piccoli giogant a is palas, po ddu agiudai, a Pavoletti. In campu finas Azzi chi gogat in sa parti destra poita Zortea non fut in is cunditzionis meglius. In palas sa prima de Luperto, in mesu de campu Deiola cun Marin.
Su Casteddu segnat a pustis mesora: Luperto cuberat po duas bortas sa bocia in mesu de su campu, dda donat a Piccoli indenanti chi cun su pei mancosu giumpat su portieri Bleve. Su matessi Piccoli a pustis dexi minutus tirat de conca e sa bocia a dogna manera dda tocat po urtimu Pavoletti: 2-0 po is piciocus de Nicola. E aici acabbat sa parti de unu de sa partida
In sa parti de dus su Casteddu s’acostiat po duas bortas a su gol de tres: a innantis cun Augello e dapoi cun Deiola de conca. Sa Carrarese non si donat po binta e erriscat, a su minutu de 53 de fairi gol con Coppolaro. Gol chi, a dogna manera, lompit a pustis dus minutus cun Panico.
Nicola cumprendit ca sa Carrarese podit torrai in partida e tandu fait imbucai dus giogadoris nous: Adopo cun Lapadula a pigai su postu de Deiola e Pavoletti. In segus imbucat finas Prati po Piccoli e su matessi giogadori de mesu campu fait su gol de tres chi arregalat sa cualificatzioni a is sardus.
Nicola at dapoi chistonau cun is giornalistas: “Sa partida m’est pragia e m’est pragia finas sa manera de ponni in campu sa gana chi si nd’est pesada in s’urtimu mesi de trabbagliu. Serbit ancora unu pagu de tempus, ma po immoi m’acuntentu poita is piciocus ant postu in campu sa barra chi bogliu sempiri biri”.
Màuru Mura
Martis su trexi de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=dzCbC4_cqO4
