Su Real Madrid at bintu po sa bia de cunidixi sa Champions Leauge, e Carrulu Anceloti, s’allenadori sou dd’at binta po sa borta de cincu. De arregodai ca su matessi allenadori itlianu nd’at bintu duas cun su Milan candu fut giogadori in campu.
In su stadiu spantosu de Wembley, in Londra, sa scuadra spagnola at sunfriu in sa parti de unu, ma dapoi at bintu sa partida po 2-0 cun su Borussia Dortmund gratzias a is gol de Carvajal e Viicius, ponendu acabbu a su caminu, finas custu de spantu, de is grogusnieddus tedescus chi cicaiant de torrai a binciri sa copa a pustis ddu airi fatu in su mesi de maju de su 1997 candu iant fatu foras sa Juventus.
Su Real de Ancelotti at sunfriu meda in sa parti de unu, massimamenti in is primus trinta minutus, chi is ominis de Terzic ant dominau. Courtois e Carvajal ant frimau Adeyemi in dd’una ocasioni manna e a pustis pag’ora Fullkrug nd’at boddiu su palu de sa porta de Courtois etotu. Ma po totu sa prima mesora is tedescus ant giogau beni de averas e su Real no at mai tirau in sa porta de Kobel, feti Vinicius si dd’at gherrada beni e invecias totu is atrus camionis ant sunfriu e pagu cosa ant fatu.
Ma in sa parti de dus de sa partida su Real de Ancelotti at mudau su giogu: inderetura Kroos s’acostiat a su gol e in segus est Carvajal, po duas bortas, a si ddue acostiai. Est su matessi difensori spagnolu, a tres cuartus de partida, a fairi gol cun dd’unu bellu corpu de conca. De tandu est feti su Real a essiri in campu e Bellingham si ndi papat un’atru gol a pagu tretu de sa porta de Kobel. Atra parada de su portieri svitzeru in pissu de unu tiru de Kroos e dapoi Vinicius ponit s’acabbu de sa cuntierra.
Su Real, Ancelotti e is tifosus spagnolus tandu podint cumentzai a festai sa copa de cuindixi. Mai, atera scuadra europea si podit acostiai a is campionis spagnolus.
Màuru Mura
Dominigu, su dus de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://mediasetinfinity.mediaset.it/video/uefachampionsleague20232024/borussia-dortmund-real-madrid-0-2-gli-highlights_F312852901015C06
