A is fueddus de eris de Giorgia Meloni, chi s’agataiat in s’atobiu de sa Nato e at nau de “essiri fiera de s’agiudu donau a Kiev” at arrespustu su numuru dus de sa Lega Andria Crippa.

“Po cussu chi pensu deu is missilis bocint sa genti, deu soi a s’imbessi e pensu ca de non fairi in manera chi, intru de s’Ucraina e sa Russia, morgiat sempiri prus pagu genti”, at nau Crippa a pustis is fueddus de sa Presidenti de su Consigliu italianu. Aciungendu dapoi: “Soi contra de su lompimentu de dogna tipu de arma a s’Ucraina poita soi a favori de sa diplomatzia chi depit tenni comenti de obietivu feti sa pagi. Finas a candu mandaus armas est craru a totus ca donaus a papai a is guerras e finas acandu agiudaus is guerras agiudaus sa morti de sa genti in sa Russia comenti in s’Ucraina”.

“Soi stetiu in Ucraina ocannu passau cun sa comissioni Esteri de sa Camera, aunia si cumbatit sa guerra, e sa genti non bolilt morri, iant a bolli sa pagi e torrai a trabbagliai – at galu aciunt -. Is organizatzionis internatzionalis, sa Nato, sa Ue e s’Onu, iant depiri favoriri atobius po sa pagi. Certu partenduru de sa realtadi ca s’Ucraina at tentu atacaus de sa Russia, ma abbisongiat acabbai custa guerra, cicai de fairi a manera chi invecias de armas, misslis e aparechius si fueddessit de politiga e diplomatzia. A mei immoi parit ca si sigat a mandai armas chi agiudant sa genti a si morri e non s’agatint mesas aunia si chistionat de sa pagi intru de Ucraina e Russia”.

Eris Giorgia Melonia si dd’at pigada cun usu capu de sa Lega, Mateu Salvini, finas chi no at fatu su nomini: “Nosu in Ucraina seus a favori de sa filera de sa difesa in su celu, chi est sa manera meglius po si difenderi. Ddu nau finas a chini est sempiri nendu ca sighendu a mandai armas si pesat ancora de prus sa guerra”. In segus sa Meloni e totu at postu in craresa ca totu sa Nato dda pensat a sa matessi manera.

 

 

Màuru Mura

 

 

 

Sabudu, su treixi de mesi de orgiolas de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.open.online/2023/09/14/crisi-migranti-ue-tunisia-memorandum-lega-vs-meloni/