Nudda armas a s’Ucraina chi non si setzit in sa mesa cun sa Russia a cicai un’acordiu. Est una de is pensadas chi prenit su progetu de pagi postu in peis de dus consiglieris, in s’amministratzioni becia, de Donald Trump, po ponni s’acabbu a sa guerra intru de is matessis Ucraina e Russia. Sa pensada narat finas ca is Stadus Unidus dongiant prus agiudus chi sa Russia no acetat de cicai s’acordiu.
Sa proposta, po cussu chi si ligit in Reuters, est stetia posta in peis de su generali Keith Kellog e Fred Fleitz, ambos furint in su Consigliu de seguresa natzonali intru de sa presidentzia de Trump. Su progetu, est a nai andat contras sa politiga, finas a immoi, de is Stadus Unidus e de s’Europa, ma finas contras de calencunu a intru de su partidu Republicanu. Ma Trump e finas chini ddu sustenit at betau abba in su fogu nendu ca is novas uficialis funt feti cussas chi nanrant issus.
Ma, sa guerra in Ucraina at essi una de is chistionis centralis de is eletzionis americanas, massimamenti intru de Donald Trump e Joe Biden, comenti est stetia in s’atobiu in televisioni de su 27 de lampadas passau. Trump at torrau a nai, prus de una bia, chena a dogna manera fairi cumprendiri comenti, ca chi bincit issu sa guerra in s’Europa de s’est at acabbai inderetura e at tentu e ita nai in pissu de is agiudus americanus a Kiev.
Po Biden e is democratigus su progetu de Trump no est atru chi totu is fueddus durcis chi Trump e totu at tentu po Vladimir Putin. “At fueddau sempiri spantosamenti de Putin e at nau ca fut unu geniu po airi cumentzau custa guerra e at finas nau chi iat aiir fortzau s’Ucraina a s’arrendiri a sa Russia”, is fueddus de James Singer, su portabogi de sa campagna eletorali de Biden. Finas sa Casa Bianca si fait intendiri: “S’agiudu de Biden a s’Ucraina est craru. Nd’at pesau una coalitzioni cun prus de cincuanta Stadus chi agiudant s’Ucraina in sa difesa de sa democratzia contras de s’invazioni de sa Russia”, at nau Adrienne Watson, sa portabogi de su consigliu po sa seguresa natzionali.
Màuru Mura
Dominigu, su trinta de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.limesonline.com/rivista/voci-dalla-russia-e-dall-ucraina-14639440/
