“Is primus fueddus chi m’at nau funt stetius: ‘Mama, cussu chi apu biviu est steriu de disisperu. Apu cicau de mi bociri prus de una bia’”. Vlasta Studenicova, mama de Mateu Falcinelli, su discienti de binticin’annus de Spoleto, acapiau e pistau de sa politzia in Florida, ddu at contau in Agorà, in RaiTre. “Matteo at a torrai intru de tempus pagu in Italia, a pustis at a torrai a partiri in s’istadi, po sighiri is studius”.
A innantis frimau cun dd’unu genugu in sa schina, dapoi sa strinta forti de unu cintu a aciungiri suferentzia in sa cella: is imaginis, fortis de averas, chi funt de su 25 de friargiu passau, faint pensai e sa Farnesina s’amostat atenta meda. Difatis de tandu sighit sa chistioni, cun is ogus de su Consolau generali in sa citadi de Miami, giai de candu Falcinelli est stetiu acapiau po violentzia (chi a pustis est passau a resistentzia).
Difatis, su babbu de Mateu, Fulviu Falcinelli no at bofiu chistonai nendu propriu ca de sa chistioni si nd’est interessendu s’ambasciad italiana.
Su matessi ministru Antoni Tajani, chi at intendiu sa mamma de su piciocu po ddi fairi cumprendiri ca su guvernu dd’est a su costau, at nau ca “cosas de macus cussu chi ant fatu a su piciocu, in Italia cosas de aici arregondat calencuna cosa chi non bogliu nemancu nomenai”. Una manera de fairi “chi non si podit biri”, at nau finas su Consoli.
immoi s’oberit una partida delicada intru de is abogaus de su studenti de Spoleto e is autoridadis de sa Florida, propriu in d’unu tempus in su cali is Stadus unidus, a pusti un’acordiu dificili, funt prontus a portai in Italia Chico Forti, cundennau in su 2000 a su presoni po totu vida de unu tribunali americau po airi bociu unu imprendidori australianu.
Sa politzia de Miami at cumentzau un’indagu po custa chistioni, ma sa mama de Mateu bolit acrariri: “In su paperis de sa politzia, scritu a pustis airi giurau, non s’agatat perunu fueddu cunfroma a is imaginis. Si ddue agatat scritu atru”.
Màuru Mura
Martis, su seti de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.today.it/cronaca/matteo-falcinelli-arrestato-polizia-miami-stati-uniti.html
