Non ce dd’at fata Satnam Singh, s’omini de trintun’annus de arreiginis indianas chi lunis a merì fut abarrau in mesu a unu incidenti legiu in su mentris chi fut trabbagliendu in dd’una sienda in Santa Maria, in is orus de Latina. Iat perdiu su brassu in dd’una machina chi serbit a imboddiai de prastica chi dd’at finas strecau is cambas.
S’omini, invecias de essiri portau in su spidali, fut stetiu lassau in denanti de sa domu sua cus su brassu segau postu in pissu de una cascita chi serbit po ndi boddiri patata e tamata. A pustis essiri stetiu portau in elicoteru a su spidali de Santu Camillu, in Roma, aunia s’est cicau de ddu ponni in saludi, ma fut dificili meda, Satnam Singh est mortu eris a mengianu in su matessi spidali. Is meris de sa sienda ddu faiant trabbagliai, “in nieddu”, de dus annus a cust’ala.
In pissu de cussa chistioni sa lei at obertu un’indagu e immoi eus a biri chini at fatu custu machiori. “Chini at a pediri perdonu po Satnam Singh?”, si pregontat Brunu Giordano, magistrau, chi in su tempus passau fut finas diretori de s’Ispetorau natzionali de su trabbagli e babbu mannu de sa lei contras de su “caporalato”, a pustis custa morti.
“Chi ses strangiu, chena regulas e tenis abbisongiu de un’ocodeddeddu de pani po biviri – narat su magistrau – depis trabbagliai ‘in nieddu’, chena peruna seguresa, chena digindadi e chena de spera. E chi in su mentris chi ndi boddis sa fruta, chi nosu boleus frisca in is butegas, o messas su trigu, po su pani chi spaciaus dogna dì, feti po tres eurus a s’ora, candu su calori lompit a coranta gradus, perdis unu brassu, non lamant nemancu unu dotori, ti scarrigant de una machina in su caminu e fuliant su brassu in su sartu e moris po perdiri totu su sanguni, ses in Italia: in sa natzioni aunia non depeus strobbai chini tenit gana de fairi”.
Màuru Mura
Giobia, su binti de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://laragione.eu/litalia-de-la-ragione/cronaca/latina-morto-satnam-singh-il-bracciante-indiano-abbandonato-dopo-un-incidente-sul-lavoro/
