De Pratobello a Saccargia. Su atobiu mannu contras de is speculadoris de su bentu arregodat cussu chi fut sussediu in Orgosolo in su 1969 candu is orgolesus iant fatu resistentzia, bincendu sa cuntierra, a su Stadu. In s’ora is sotzius aprontadoris si faint intendiri: “Custu est feti su cumentzu, eus a sighiri a aboginai. Non boleus chi sa terra nostra si prengiat e turris po su bentu e pannellus”.
Non s’agatat orrogu de Sardigna chi non siat interessada, difatis funt prus de otuxentus is pratigas acapiadas a parcus de su bentu, pannellus fotovoltaicus e turbinas off shore po is calis est stetiu pediu su permissu po fairi parti de sa filera energetica natzionali po tenni incentivus. Funt progetus chi postus in peis podint produsiri cincuantotu gigawatt de eletricidadi: “Est una cantiddi chena logica, non ce dd’iaus a fairi a da portai mancu a foras, mancu cun su Tyrrhenian Link”, narant de su comitau po sa difesa de sa terra de Uta.
“Sa politiga si depit ponni in conca ca sa terra est de is sardus e andat difendia sempiri”.
Est a nai ca is politigus de is istitutzionis si funt amostau si pagus a s’atobiu mannu de Saccargia. Giustu calencunu sindigu o consiglieri comunali de is terras prus interessadas a custu disacatu.
“Non teneus s’agiud de perunu partidu politigu”, faint sciri de unu sotziu, “e finas chena de custu ce dda eus fata a ndi pesai un’atobiu de populu comenti de custu, chi in Sardigna s’est bidu bortas pagas”.
In is mesis benientis at a lompiri, de seguru, un’atru atobiu mannu: “Seus giai pensendu po su mesi de cabidanni in calencun’atru logu simbulu de sa Sardigna. Si depit sciri ca seus feti a su cumentzu de custa cuntierra. Ce dda seus fendu a fairi cumprendiri a sa genti is erriscus mannus po s’Isula nosta. Eus andai a innanti e non si ndi eus a fairi furai sa transitzioni energetica”, est sa bogi chi si stagliat prus de totu is atras.
Màuru Mura
Lunis, su dixiaseti de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://blog.cvaenergie.it/energie-rinnovabili/il-dibattito-sullimpatto-paesaggistico-delle-pale-eoliche-quali-sono-le-argomentazioni-a-favore-e-contro/
