Serrada s’inchiesta “Monte Nuovo” de parti de sa Diretzioni contras de sa mafia de Casteddu, portada a innantis de is carabbineris de su Ros chi in su mesi de cabidanni de ocannu passau iat fatu testai su presoni a treixi personis e atrus dixiotu funt cun is acapius in domu. Su pubricu ministeru Emanueli Secci, finas chi su Tribunali de su riesamini iat escludiu s’associatzioni mafiosa at poderau s’idea sua.
Matessi curpa finas po su retori de Tatari, e candidau a sindigu po su centrudresta, Baizu Mariotti, incurpau de essiri cussu chi moviat is filus paris a su dotori Tomasu Cocco, a Nigolò Cossu, ritenniu su capu, e connotu cun s’annomingiu de Cioccolato, Toninu Crissantu, s’assessora becia de s’agricoltura Grabiella Murgia, Batista mele, Giuanni Mercurio, Giusepu antoni Mesina e Paulu Murgia.
Su retori de s’universidadi a pregunta at arrespustu: “No apu acora erriciu nudda. A is carabineris ia giai donau totu is paperis chi mi iant pediu. Soi chena de fueddus”.
Atrus funt indagaus po curpas prus piticas: Alissandru Arca, Pissenti Deidda, Giusepu Paulu Frongia, Anna Gioi, Arrafiaele Gioi, Sarbadori Gioi, Marcu Lai, Tomas Littarru, Antoni Marteddu, Arricardu Mercuriu, Afinu Monni, Marcu Muntoni, Antoni Migheli Pinna, Paulu Sale, Marcu Zanardi, Vito Mauritziu Cossu, Andria Daga, Alessia Deidda, Alice Deidda, Antoni Fadda, Mariu Antoni Floris, Desideriu Mulas, Alisandur Rocca.
A totu custus s’aciungint, portenduru su numuru a 34 indagaus, Giorgio Carboni (chi fut su diretori sanitariu de s’Ats e immoi diretori generali de sa Asl de su Campidanu de Mesu) e Massimu Temussi.
Po is magistrau de s’Antimafia in Sardigna si fut pesada una truma po delincuiri comenti de is mafiosus chi fut in Casteddu, in Barbagia e in s’orrestu de Sardigna chi, fendusì fortza cun amelessus e cun sa pagu gana de fueddai de sa genti, at fatu su bellu e su malu tempus.
A calencunu de is indagaus benit fata sa curpa de airi agiudau sa bandidura finas de Gratzianu Mesina de su 2020.
Màuru Mura
Giobia, su seigi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.procura.ca.it/
