Sa cosa de erriri est ca totus funt castiendu sa filera de scuadras aunia s’agataiat s’Italia e si biant giai in finali, ca feti s’Inghilterra podiat arriolai. Ma, eris in Berlino, est bastada sa Svitzera po ci bogai de is Europeus de fubalu s’Italia, Spalletti, Gravina e totu unu mundu chi est una pena. Funt bastaus dus gol, unu in sa parti de unu (Freuler) e unu in sa parti de duas (Vargas). E su miniscimentu de is svitzerus est mannu e prenu ca sa partida po is asulus no est mai cumentzada: pariat una scuadra de ominis contras de una scuadra de pipius. Chi ndi tiraus su portieri Donnarumma, is atrus giogadoris, in cuatru partidas giogadas, ant amostau totu is lacanas intru de unu bonu giogadori e unu campioni.
Spalletti at fraigau sa Natzionali in pissu de is giogadoris de s’Inter, de sa Juventus e de sa Roma. Dapoi at postu Scamacca e Di Lorenzo, chi in cuatru partidas ant fatu piedadi, e imbestiu su totu: a pigliu nd’est bessia una scuadra chena de giogu, ma presumia meda ca si creiant is prus fortis de totus. A nai sa beridadi ci depiant stupai giai de a innantis: tocat a torrai gratzias a cussu gol de Zaccagni cun sa Croatzia, candu sa partida fut acabbendu.
Non seus in disprageri po nuddaca est giustu aici e po una bia su Deus de su fubalu at trabbagliau beni. Dispragit feti po is tifosus italianus chi funt disterraus in Germania, ma a is giogadoris eita nde dd’important? De oi ant essi in ferias e giai non tenitn arriolu de cuatru disterraus.
Feti una pregunta nosi feus in pissu de is giogadoris chi Spalletti at sceberau: abbisongiaiat unu comenti de Nicolò Fagioli, de sa Juventus? No at giogau po un’annu intreu po mori de issu etotu, ca ddi pragiat a scumitiri, e ddu at preferiu a atra genti. Chini fait sceberus de aici minescit a ci bessiri de mesu e a si castiai is atras partidas.
Màuru Mura
Sabudu, su bintinoi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=NfkPvsElqrc
