Migheli Guerra, sindigu de Parma, est cussu prus bofiu beni in Italia. Intru, invecias de is presidentis de Regioni, su prus bofiu beni de is citadinus est Massimilianu Fedriga chi est su presidenti de sa Regioni de su Friuli Venetzia Giulia.
A pubricai sa cica intru de s’agradamentu de is aministratoris comunalis e regionalis est comenti in donnia su Sole 24 Ore chi at difundiu eris is numurus nous de s’indagu lamau “Governance Poll” agiudau de s’istitutu de cica “Noto Sondaggi”.
A is palas de su sindigu de Parma si ddue agatant atrus dus sindigus chi apartenint a su centrumanca: Gaietanu Manfredi de Napoli e Migheli De Pascale primu citadinu de Ravenna.
Invecias po cantu pertocat is presidentis de Regioni, a pustis cussu de su Friuli Venetzia Giulia si ddue agatant unu de su centrumanca, est a nai Stevini Bonaccini de s’Emilia Romagna, chi a dogna manera at lassau a pustis chi in sa torrada eletorali po is Europeas c’est bessiu po Bruxelles, e unu de su centrudrestra, su leghista Luca Zaia, chi de una bona pariga de annus ghiat sa regioni de su Venetu.
Po cantu pertocat is aministradoris, sempiri comunalis e regionalis, chi invecias non funt bistus beni meda de is citadinus, agataus po is sindigus, in s’urtimu postu, cussus de Roma, Robertu Gualtieri, e cussu de Palermo, Robertu Galla. Intru de is presidentis de Regionis a is usrtimus postus si ddue amostant Franciscu Rocca, presidenti de sa Regioni de su Latzio, Migheli Emiliano, presidenti de sa Regioni de is Puglias e Franciscu Acquaroli, presidenti de sa Regioni de is Marche.
Massimu Zedda, sindigu nou de Casteddu, e Alissandra Todde, presidenti ateretanti noa de sa Sardigna non si ddue agatant in custu indagu, poita su Il Sole 24 Ore at decidiu de non pigai in cunsideru is Cumunus e is Regionis chi ant votau ocannu in su 2024. E po sa matessi arregioni no at pigau in cunsideru nemancu is sindigus e is presidentis becius. Tanti po Paulu Truzzu e Christain Solinas at fueddau su sceberu de is citadinus…
Màuru Mura
Martis, su seiixi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.parmatoday.it/politica/intervista-sindaco-michele-guerra.html
