Po cussu chi s’est amostau e po cussu chi naranta de sa parti de Donald Trumpu, s’atobiu de unu, in sa televisioni, intru de su matessi Trump cun su presidenti Joe Biden sinnat unu puntu a favori de chini sfidat. Biden s’est amostau cun dd’una bogi debili, po mori de un’arresfriu at nau, e at achichiau prus de sempri. Finas chistionada chi si cunfundiant e torradas a nai comenti chi fessint preparadas. totu craru finas po is democratigus chi immoi timint de ddu biri afundai in is sondagius.
Trump, cunfroma, est partu unu lioni prenu de energia, finas, chi est a nai, no at arrespustu a preguntas meda, insoma at nau cussu chi boliat e forsis cussu chi sa genti bolit intendiri.
Cussu chi contaiat de prus in custa cuntierra intru de is dus candidaus prus becius de sempiri fut sa prova po s’idadi: est a nai sa craresa e su corpus. Biden e Trump funt lompius in Atlanta in su studiu de sa Cnn americeddu. Biden paris a sa pobidda Jill in su mentris chi Trump est erribau a sa sola, chena Melania e perun’atru parenti.
Non si funt strintus sa manus e non si funt mancu castiaus in faci candu est partia, po duas bias, sa publicidadi. Si funt atumbaus in totu, incurpendusì unu cun s’atru de non nai sa beridadi: de s’economia a s’imigratzioni, de su clima a s’aurtingiu. Trump at inderetura pigau puntus candu at chistionau de s’inflatzioni “chi est bocendu is Stadus Unidus” e in pissu de is ennas obertas in sa lacana cun su Messicu “aunia imbucant dellecuentis e terroristas”. Biden at chistionau de is spantus chi at fatu a pustis sa scrava lassada de Trump etotu, massimamenti po sa politiga chi at favoressiu is erricus.
Finas po cantu pertocat sa politiga foraas de is Stadus Unidus funt unu de una parti e unu de s’atra. Trump at ripitiu ca sa gherra in Ucraina non s’at essi amostada chi is Stadus Unidus iant airi tentu unu presidenti comenti si depit, ma no at donau peruna arretzeta po dda fairi acabbai. E a sa pregunta intru de sa gherra de Israele cun sa Palestina at feti nau ca “Israele depit acabbai su trabbagliu cun Hamas”.
Màuru Mura
Giobia, su bintiseti de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://news.sky.com/story/donald-trump-and-joe-biden-the-key-moments-in-the-us-first-debate-13160189
