De is ses Stadus chi ant a decidiri chini at essi su Presidenti de is Stadus Unidus, su 5 de Sant’Andria benienti, cincu amostant Donald Trump a innantis e feti in dd’unu Joe Biden. Ddu scoviat s’urtima cica de su New york Times e de su Siena College, chi amostat finas sa calada de Biden, massimamenti intru de is eletoris non arvus e intru cussus prus giovunus. In sa cuntierra intru de chini podit votai, Biden est a innanti veti in Wisconsin (49% contras su 45%), in su mentris chi Trump est a innantis in in Pennsylvania (47% a 44%), Arizona (49% a 42%), Michigan (49% a 42%), Georgia (49% a 39%) e Nevada (50% a 38%). Is numurus funt ogualis finas chi si ddue ponit in mesu s’atru candidau indipendenti, Robert F. Kennedy Jr, chi, in sa cica, est a su 10% in totu de is ses Stadus. Est a nai ca Kennedy ndi pinnigat votus, cuasi ogualis, de una parti, cussa de Trump, e de s’atra, cussa de Biden.
Is ses Stadus pigaus in cunsideru in s’urtima torrada eletorali de su 2020 iant fatu binciri totus a Biden. A dogna manera, narat su giornali americanu, is vitorias in Pennsylvania, Michigan e Wisconsin iant a bastai a Biden po torrai a binciri, ma depit finas a binciri in totu is atrus Stadus aunia iat bintu is su 2020. S’urtimu scoviamentu de su New York Times est de su mesi de Sant’Andria de su 2023. De tandu si nd’est pesau su mercau atzionariu americanu finas a su 25%, est cumentzau su processu de Trump in Manhattan e finas sa campagna eletorali de Biden chi at postu a curriri milionis de dollarus in publicidadi, prus che a totu in is Stadus chi eus arremonau. Ma, parit ca totu custu non est serbiu a meda, poita is numurus funt, prus o mancu, cussus chi si furint amostaus ses mesis a immoi.
Su matessi giornali narat puru ca chi Biden non bessit, invecias is cumpangius de partidu po una cadira in su Senau si dda passant meglius meda.
Màuru Mura
Martis, su catodixi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.bloomberg.com/news/newsletters/2024-05-13/biden-aims-to-show-voters-he-s-as-tough-on-china-as-trump
