Su turismu fait artziai s’economia de sa Sardigna, e de seguru custa no est una nova. Is logus che albergus e villagius de s’Isula in su 2023 funt torraus a tenni numurus prus artus de cussus de a innanti de su Covid: 15,7 milionis de genti lompia in sa terra nosta chi bolint nai mesu milioni in prus de su 2019. In percentuali est su 6,7% in prus e, a si castiai prus acanta, su 7,7% in prus cunfroma a su 2022. Est finas a nai ca is numurus de is primus tres mesis de su 2024 faint sperai beni, ca funt prus artus de cussus de su 2023.
Custus funt is numurus de una cica de su “Centro studi de sa Cna Sardigna”. E a is numurus uficiali tocat a aciungiri finas su turismu de is segundas domus, domus vacantzas e b&b trabagliaus non in manera imprenditoriali. Manna de averas su pensamentu de is turistas chi lompint de foras s’Italia, ca funt prus de su 13%.
Chi castiaus, da poi, is numurus de is atrus logus de s’area Mediterranea (Creta, Algarve, Puglia, Corsica, Croatzia, Malta, Sicilia, Baleari, Calabria e Cipro) sa Sardigna in su 2022 at tentu su 5,6% de is presentzias in totu e su 5,1% de is presentzias in totu in custas regionis.
A castiai sa tassa prus pagu prena, s’orrestu de s’Italia est crescia de prus. Difatis sa Sardigna at perdiu duas positzionis in sa classifica natzionali comenti de numurus de presentzias intru s’annu cunfromma a su 2019, giumpada de Liguria e Sicilia. E non feti: in is urtimus dus annus su pesamentu de su turismu est prus basciu de cussu de atras regionis ogualis comenti sa Puglia e sa Sicilia.
Si podit fairi de prus ca su turismu in Sardigna tenit potentzialidadis mannas e ancora de preniri e tocat a amostai sa vacantza in terra sarda non feti comenti cussa de mari. Difatis sa Sardigna si prenit de turistas massiamenti in is mesis de s’istadi, lassendu a disigliai in s’orrestu de s’annu.
Màuru Mura
Cenarba, su bintunu de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ge.camcom.gov.it/it/promuovi/turismo/eventi-e-notizie-turismo/5-ottobre-2022-pubblichiamo-il-secondo-report-sullosservazione-economica-dedicata-al-turismo
