S’Italia perdit po 1-0 contras de sa Spagna in sa partida de dus de is Europeus de fubalu.

In sa Veltins Arena de Gelsenkirchen, domu famada de su Schalke 04, s’amostat una partida chi no at mai tentu storia et est a nai ca a is spagnolus s’1-0 de s’acabbu andat strintu meda. Ant fatu sa partida de su cumentzu cumandendu su giogu. Feti su portieri italianu Donnarumma est stetiu spantosu, in su mentris chi totu is atrus giogadoris asulus pariant piciocheddus chi non c’ant cumprediu nudda. A decidiri sa partida est stetiu su giogadori de difesa de su Bologna Calafiori, ca c’at betau sa bocia a is palas su matessi Donnarumma. De spantu su giogadori spagnolu Nico Wiliams chi at amachiau a Di Lorenzo de su cumentzu a s’acabbu. De averas pariat unu omini mannu gioghendu cun dd’unu pipiu.

Lucianu Spalletti, s’allenadori toscanu de s’Italia at cumentzau sa partida cun is matessis giogadoris chi iant bintu contras de s’Albania: Donnarumma; Di Lorenzo, Calafiori, Bastoni, Dimarco; Jorginho, Barella; Chiesa, Frattesi, Pellegrini; Scamacca.

Invecias, De La Fuente, s’allenadori spagnolu, ndi cambiat unu de is undixi chi iant cumentzau cun sa Croatzia: Delaporte invecias de Nacho. E giogant: Unai Simon; Carvajal, Le Normand, Laporte, Cucurella; Pedri, Rodri, Fabian Ruiz; Yamal, Morata Nico Williams.

Inderetura sa Spagna fait cussu chi bolit in campu e chi sa prima parti fut acabbada po 2-0 non ci iat stetiu de nai nudda. Feti in sa parti de duas sa Spagna fait su gol, finas scofau, est a nai, ma su miniscimentu ma de is ominis de De La Fuente no est mai stetiu postu in chistioni. Feti po nai: su portieri spagnolu Unai Simon at fatu sa prima parada a su minutu de otantases, chi parada si podit lamai.

Immoi is asulus s’ant a giogai sa cualificatzioni a is otavus contras de sa Croatzia: dis at a bastai unu puntu po andai a innantis.

 

 

 

Màuru Mura

 

 

 

Cenarba, su bintunu de làmpadas de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.today.it/sport/euro-2024/spagna-italia-1-0-commento.html