Feti Zito Luvumbo no est a disponimentu de s’allenadori Davidi Nicola po sa partida de custu merì, a is noi oras mancu unu cuartu, in sa Unipol Domus intru de su Casteddu contras de su Genoa de Vieira. Su giogadori chi lompit de s’Angola s’est strupiau dominigu passau in Bologna, in sa partida perdia po 2-1, e at essi custrintu a abarrai in foras, a pustis chi giai iat sartau dus mesis de partidas. Est a nai finas ca Luvumbo no at a giogai mancu sa partida benienti contras de sa Roma de Ranieri e s’at a provai a ddu torrai a cuberai po sa partida cun su Monza de su 30 de martzu, a pustis su pasamentu po sa partida de s’Italia, sempiri in Sardigna.
Torrat invecias a dispositzioni Kingstone, chi iat sartau is urtimas duas partidas po mori de corpu chi iat pigau a su genugu de manca. A dogna manera su giovunu atacanti no est chi apat giogau meda ocannu, ca in totu po tres bias at testau su campu. De mancu de issu feti Jakub Jankto e su tertzu portieri Giusepu Ciocci, chi ancora su campu non ddu ant mancu bidu. Po s’orrestu de is giogadoris mancu unu problema. De martis, cumandau de su presidenti Giulini, sa scuadra est dogna dì paris in Asseminello po aprontai sa partida in sa manera meglius. Est de grandu importu custa partida finas poita su Casteddu s’agatat a feti tres puntus in prus de s’Empoli ca, chi su campionau acabbessit oi, ci iat calai in sa serie B.
Custus is bintitres giogadoris lamaus de Nicola po Casteddu-Genoa:
Portieris: Elia Caprile, Giusepu Ciocci, Alen Sherri.
Difensoris: Tomasu Augello, Pitanu Luperto, Yerry Mina, Adam Obert, José Luis Palomino, Grabieli Zappa, Nadir Zortea.
Giogadoris de mesu campu: Michel Adopo, Alissandru Deiola, Matia Felici, Giuanniluca Gaetano, Jakub Jankto, Antoine Makoumbou, Răzvan Marin, Mateo Prati, Nicolas Viola.
Atacantis: Florinel Coman, Kingstone Mutandwa, Lionardu Pavoletti, Robertu Piccoli.
S’arbitru at essi Michael Fabbri de sa setzioni de Ravenna.
Màuru Mura
Cenarba, su seti de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=JObmFhHAkew
