S’Italia non ce dda fait a binciri cun dus gol de scartu e a si pigai sa cualificatzioni a is Final Four de sa Nations League 2024-2025. A pustis airi perdiu, po 1-2, sa partida de unu s’atra dì in su stadiu Giusepu Meazza de Milanu, eris in sa partida de torrada in su Westfalenstadion de Dortmund cun is tedescus est acabbada in paridadi po 3-3. Cun custu arresurtau is tedescus passant su turnu e a is asulus abarrat su marigosu in buca po comenti podiant andai is cosas e invecias non funt andadas. Massimamenti si nci papant is manus po sa partida de merucuris passau in Milanu ca, prus che a totu candu s’Italia fut bincendu gratzias a su gol de Tonali, Difatis in cuss’ora is piciocus de Spalletti si funt acostiaus prus de una bia a su gol de dus chi iat airi permitiu a is asulus de controllai meglius sa partida.
Sa partida de Dortmund est cumentzada inderetura in bessida po Barella e cumpangius: is meris de domu, difatis, funt partius a forti e serrant sa parti de unu de sa partida po 3-0, torrendu gratzias a is gol de Kimmich de is undixi metrus (rigori donau de s’arbitru po mori ca Buongiorno poderat sa magligedda de Kleinkienst), Musiala (de erriri po comenti est nasciu ca pariat de castaii una partida intru de pipius) e Kleindienst, su matessi atacanti chi si fut cuberau su tiru de rigori e chi giai iat fatu gol in sa partida de Milanu.
In sa parti de dus de sa partida Saplletti cicat de mudai calencuna cosa e fait imbucai Politano cun Frattesi po fairi abarrai setzius Gatti cun Daniel Maldini. E calencuna cosa mudat inderetura ca Kean fait su gol de su 3-1. Su matessi atacanti de sa Fiorentina segnat su 3-2 e dapoi Raspadori, imbucau biora de su minutu de setanta, paregiat sa partida cun dd’unu tiru de is undixi metrus. Ma fut tropu adduru po cicai de binciri sa partida.
Màuru Mura
Lunis, su binticuatru de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=2YiM80rvcGk
