Finas in Sardigna si pregat po su Paba. Initziativas postas in peis calencuna borta de is piscamus, calencun’atra de is preideris etotu e non mancant mancu is fidelis chi si donant atobiu in is cresias sardas po s’Orrosariu. “Deus de sa vida podera Franciscu paba nostu: donaddi pagi in su corpu e in s’anima”, at pregau sa genti in totu is missas fatas s’atra d’, a s’incras de su bulletinu de is dotoris, de su spidali Policlinico Gemelli, chi at arriolau totu is fidelis. Giai de mercuris de sacida passada, s’arcipiscamu Giuannifrancu Saba iat cumbidau is comunidadis de sa cresia de sa diocesi turritana de agiudai cun sa pregadoria su Paba. Torrau a arrepitiri sabudu passau, su bintidus de friargiu.
In sa Catedrali de Casteddu s’arcipiscamu Giusepu Baturi, segretariu generali de sa Cei, in su merì de eris at ghiau s’Orrosariu in dd’una cresia prena a cucuru. Totu po sa slaudi de Franciscu. “Est prus prena meda s’acostiamentu a Franciscu de sa comunidadi diocesana nosta. At essi su Segnodi, dotori de is animas e de is corpus, su trabbagliu de is dotoris e de sa genti chi trabbagliat in su spidadi chi si s’at pigau incarrigu cun umanidadi e cumpetentzia e pregaus in artu poita ddi bengiat arregalada sa pagi in su corpu e in s’anima”, is fueddus de Baturi chi, a dotna manera at sighiu: “Candu est lompiu in Sardigna su 22 de cabidanni de su 2013, su paba iat nau ‘soi erribau po cumpartziri cun bosu allirghia e spera, trabbagliu e impigni, idealis e bisus de s’Isula bostra e po si cunfirmai in sa fidi’. Immoi seus nosu a bolli cumpartziri is fatigas e is speras suas. Pedeus a su Deus chi bolit beni a sa bida de castiai cun ogus sabius su sebidori e paba nostu Franciscu, poita torrau a ponni a nou sigat sa missioni sua po sa Cresia. Su Paba nos est imparendu ca totu sa vida tenit valori”.
Màuru Mura
Martis, su binticincu de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.adnkronos.com/cronaca/papa-francesco-condizioni-salute-oggi-news_5XvsoOwLSgcgg4K81i7P5q
