S’atori de cinema, chi at bintu po duas bias su premiu Oscar, Gene Hackman ddu ant agatau mortu in sa domu sua de Santa Fe. Paris a s’atori finas sa pobidda, sa sonadora de pianoforti Betsu Arakawa. E finas su cani de is dus est stetiu agatau mortu. Hackman teniat norantacinc’annus e sa pobidda norantatres.
Su scerifu de sa contea de Santa Fe, in su New Mexico, Adan Mendoza at donau testimonia de sa morti de s’atori e de sa Arakawa, ma no at faut peruna pensada in pissu de s’arregioni: “Totu cussu chi possu nai est ca seus in su paris de un’indagu po sa morti de is dus e ca seus aspetendu de podiri cumpudai sa domu”, at nau.
Nasciu su 30 de gennargiu de su 1930 in San Bernardino, chi est in California, Gene Hackman si fut cojau in su 1956 cun Fay Maltese de sa cali at tentu tres figlius: Christopher Allen, Elizabeth Jean e Leslie Anne. In su 1986, a pustis trint’annus, si funt stagliaus. E, aici, in su 1991 si fut torrau a cojai cun sa musicista Betsy Arakawa, agatada morta cun issu in sa domu insoru.
In su 1999 iat publicau Wake of the Perdido Star. In is annus duamila iat sighiu su trabagliu de scritori boghendu a pigliu atrus cuatru contus. In su 2008, candu at presentau su libburu de unu, Escape from Andersonville: a Nobel of the Civil War, iat fatu sciri ca no iat airi prus trabagliau comenti de atori: “Soi cuatr’annus chi soi atesu de su cinema e depu nai ca non mi mancat po nudda. Chi boleis podeis nai ca mi soi arretirau, ma sa realtadi est ca mi pragit cussu chi soi fendu, est a nai a scriri”.
Hackman at bintu dus Oscar (cun is films Il braccio violento della legge e in su 1993 cun Gli spietati de Clint Eastwook), cuatru Golden Globe, dus BAFTA e un’Ursu de prata. E, de is annus sessanta, in su cinema at sempiri portau is bestiris de su malu.
S’urtimu film aunia at trabbagliau est cussu de su 2004: Due candidati per una poltrona.
Màuru Mura
Giobia, su bintiseti de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://it.wikipedia.org/wiki/Gene_Hackman
